All posts by : Vyapari Mitra

स्वातंत्र्य हा आपला जन्मसिध्द हक्क आहेच. पण त्याचा स्वैराचार होऊ न देणं हे आपलं आद्यकर्तव्य आहे. या आद्यकर्तव्याचा गेल्या काही वर्षात आपल्याला विसर पडू लागला आहे की काय असे सध्याचे वातावरण झाले आहे. केवळ स्वतःचा विचार न करता देश प्रथम [ Nation first ] हा विचार कृतीत उतरविण्याची आज खरी आवश्यकता आहे. जगातील सर्वाधिक लोकसंख्या असणारा देश म्हणून आपली नवी ओळख निर्माण झाली आहे. भारत ही जगातील 5 वी मोठी अर्थव्यवस्था आहे. याचबरोबर सर्वाधिक तरुणाई असणारा आपला देश आहे. या तरुणाईला विधायक अशा कामात गुंतवून ठेवणे हे आज देशापुढील मोठे आव्हान आहे. तरुणांनीही हरित ऊर्जा, नवे तंत्रज्ञान यासारख्या क्षेत्रात आपले ज्ञान आणि कौशल्य अधिकाधिक विकसित करण्यासाठी प्रयत्नांची कास धरायला हवी. याच्या जोरावरच ‘आत्मनिर्भर भारताचे’ आणि ’शाश्‍वत विकासाचे’ स्वप्न पूर्ण होणार आहे. 75 ते 100 वर्षे हा 25 वर्षांचा भारताचा अमृतकाळ राहणार आहे. याच काळात भारताला विकसित देशांच्या पंक्तीत उभे राहिलेले बघायचे आहे. 76 व्या स्वातंत्र्यदिनी हा संकल्प आपण करूयात. यासाठी 140 कोटी मजबूत हातांची आवश्यकता आहे. संघटित प्रयत्नांतून इतिहास निर्माण होतो हे भारतीयांना सांगण्याची अजिबात आवश्यकता नाही. स्वातंत्र्य दिनाच्या खूप खूप शुभेच्छा ! जय हिंद !